#عن براء أشرف

ساعات كتير بنبقى بنكتب علشان نكتب و خلاص شغلانة و سبوبة يمكن ناكل عيش وساعات بنكتب علشان نتنفس هوا نظيف ,وساعات اكبر بنكتب علشان نعيط بصوت عالي من غير ما حد يقولنا ليه و علشان ايه ..

موت #براء_اشرف يوم 6 سبتمبر 2015 خلاني محتاجة اعيط و اكتئب من غير ما حد يسألني وشك لونه كده ليه وزعلانة ليه رغم كم الفقد اللي مريت بيه في حياتي بس أنا لحد دلوقت معرفتش أعيط ,, يمكن لسة مش قادرة اتكلم عنه دلوقت يمكن هتكلم بكرة او بعده او بعد سنة لكن حاليا كل اللي انا فاكراه اني بكتب من غير ما اخد بالي من شكل الكلام بهمزة ولا كسرة ولا محتاج تنوين ولا واخدة بالي ولا عارفة افكر ايه اللي ممكن يتقال وايه اللي يصح وما يصحش ولا زعلي منه في يوم انه في لحظة ما تخلى عني في شغل كنت بعمله و محتاجة وجوده فيه جداً .. كل اللي فاكراه دلوقت لما كتب ستة أسباب للحنين إلى روبي و عن الإضحاك كمسألة سخيفة وهو بيقول الجملة الأهم اللي شكلت حاجات حاجات كتيرة في شكل التدوين عندي ..

قول الحكاية أن هناك حكاية واحدة باقية. 
وأن عليها أن تظل باقية، كما أن عليها أن تبقى وحيدة

ايوا انا فهمت دلوقت معناها ,,, أن في حكاية واحدة باقية وهو الموت اللي مخدناش بالنا انه هياخدك في اللحظة دي ولا شكل عنيا وانا بمسحها مرة و اتنين وانا بقرا خبر موتك وانا بحط ايدي على صدري من الوجع 
وأنا بشوف أسمك ترند في تويتر اللي هو أول حاجة بعملها لما أفتح عينيا الصبح وكل اللي كان في بالي انهم قبضوا عليك لقيت اول تويتة في وشي ليليان داود بتنعيك !! 
نعي أيه يا حاجة انتِ بتهرجي ولا شاربة شاي بلبن بس شفت احمد زين و وائل خليل و وائل عباس و الصباغ وحنان كامل بيقولوا نفس الكلام ..

الكلام طلع جد ..
وبقول مبقاش فاضل حد علاء عبد الفتاح مبقاش يكتب بقى بعيد اوي , وائل عباس بيكتب بس علطول بيشتكي من وجع قلبه ومخوفني اوي الموضوع ده ,, كل اللي بنحبهم مبقوش يكتبوا في المدونات اه بيكتبوا في اماكن تانية بس مش زي البلوجر أصل ريحة البلوجرات عاملة زي طعم البيوت و شكل الكليم في الأرض و الشيش الأخضر و صوت بياع الفول وريحة ورق الجرايد في الكشك وانتَ بتشتريه لأبوك الساعة 6 الصبح
  
المدونات فكرة ؟ 
لأ طبعاً هي أشخاص بنرتبط بيهم بالحروف مش مهم مين ضد مين ولا مين مع مين في النهاية أحنا عبارة عن حروف اتشكلت وارتبطت ببعضها على مر السنين مش عاوزة اتكلم عن براء اللي احلامه كانت سابقة سنه ولا جريه الغريب على تحقيقها مش عاوزة اصلا اتكلم عنه بصفة كان انا بكره حروف كان .. جربتها مع بابا وماما و عارفة قد ايه هي مؤلمة ..
براء كان سابق احلامه 
براء كان طفل معجزة 
براء كان و كان وكان 
ملعون ابو كان 
كل اللي فاكراه دلوقت انه تحت التراب و قضى أول ليلة في قبره أمبارح  ,مكان نوم جديد يشبه تعريفه على الواتس اب سنين طويلة كان كاتب كلمة سفر .. 
قبل ما يغيرها لنقطتين ..

سفر جديد ..
اه هو سرير جديد و سفر جديد يا براء لا هو لبنان ولا أسطنبول ولا حد هيوقفك في المطار تاني ويقعدك اربع ساعات استجواب في بلدك ..
بدري يا براء على السفر الأخير والله بدري ولكن هي ارادة ربنا اللي ليها حكمة أحنا منعرفهاش ولا ممكن هنستوعبها ليه بنموت .. 
 كل اللي اعرفه يا براء انك سافرت خلاص وانك مش بتهزر ..

هو انتَ مشيت بجد ؟؟ ..
مع السلامة يا مشمش أفندي و سلملي على كل اللي راحوا

#وداعا_براء