عيني على الجدع ...

يمكن يكون حلمي نجمة و ضحكة 

ممكن أكون حلم بيجري على قوس قزح 

ممكن أكون غيمة و مطر
بس ده في الحلم ,, 

وأنا تعبت من الأحلام 

وعاوزة أرجع أنا

تعبت من التوهة والحرمان
تعبت من غدر وحكايات الأوهام
تعبت من محاولات النسيـان
 

يوم بعد يوم 

ماسكة خيط من الصبر وخيط من النسيان
وبغزل توب مالوش ألوان 

مستنية أشوف نهايته حلوة
ولا مش هيبان

يمكن يستر ليالي البرد والحيرة والكتمان
يمكن ياخدني لبحر بعيد وأرض من نور تحضن حزني
وتعيشني في أمان
يمكن أنام بين كف القمر ويحضني كمان وكمان
يمكن أغني في ليالي السهر وأتوه 

بين شفايف حبيبي اللي كان
يمكن أداوي جرحي وأعيش وسط فرح منسي 

يحاوطني بالحنان
يمكن أرسم جرحي على الحجر وعلى البيبان

لكن يا صاحبي أنت اللي هتعيش وحداني
محروم من الضحكة وحتى السكات
هتعيش بقلب مليان غيوم
وبحكاوي الغدر والهموم

يا عيني على الجدع لما الأيام 

هتخليه سواح في بحر الندم
وقلبي طول عمره دليلي 

ولا يوم سابني لوحدي وخلاني عدم
 

عيني على الضحكة لما تتحول لبكا
و على اللهفة لما تتحول لحجر