2012
بدأت زي السنتين اللي قبلهم مؤلمة
و موجعة اثار وفاة ماما و بابا وبعض من
البشر اللي عدوا على الواحد خلوه فقد الثقة
في كل اللي حواليه ناس كدابة ومنافقة
و متلونة في ناس جميلة و رقيقة وعاملة زي
الحلم كمان دخلوا دنيتي اتعلمت حاجات و
اتقرصت اوي من حاجات تانية بكيت و حلمت و
تعبت و كملت
كان حلمي هيوقف لأسباب كتيرة من الخذلان مرة
ومن الأوجاع مررة ومن اتهامات بأني ما أصلحش للكتابة او معدومة الموهبة
ومن ناس تانية بأني معنديش جديد وفي ناس
خلتني أمشي طريقي الصح اللي أمنوا بشغلي
من البداية في ناس بتهدم وناس بتبني كملت
وبدأت من جديد و بكمل المشوار
اللي عاوزة اقوله ..
أن طول ما أحنا عايشين بنتعلم متخليش حد يوقف حلمك بكلمة سخيفة أو بنظرة اسخف كل واحد جواه حاجة حلوة و بتميزه عن الأخر كل واحد جواه حلم ومحتاج يحققه حتى لو كان بينه و بين نفسه كل الحدوته شوية مجهود زي ما الكنج بيقول
صحيح ساعات الألم بيكون أقوى و أنا ما بقولش
اني تخلصت منه نهائيا أبدا لكن بيحركني
بطريقة أنشط بيخليني أكفي مشوار حلمت بيه
من زمان وبدأت أفهم مع الوقت الحلم مش
أشخاص بعينها الحلم هو أنت .. نفسك و
أرادتك محدش هيموت لو حد سابه محدش هيموت لو محدش ساعده محدش هيموت من قلة الوفا أو الحب الدنيا ماشية عليك أنك تمشي معاها و تكمل
وتحبها زي ما هي بحلوها و مرها
قرارات خدتها السنة دي و تصديت لناس و قربت
لناس مش حزينة على اي قرار خدته ولا موقف
تصديت ليه ولا طريق مشيته بالعكس بدأت أحس
أني بعمل الصح لأول مرة و بأختياري مش بأختيار
حد صحيح صعب تكمل لوحدك وانت ساعات بتبقا
بردان محتاج ونس حد يقولك انت صح ولا غلط
بس القرارات الفردية بتقوي و بتخليك أعلى
طاير في سما اتخلقت ليك لوحدك
لكل واحد أذاني بقول أو فعل
لكل من خان و تكبر
لكل من شجعني و قرب
لكل من مسح ليا دمعة
لكل من ساعدني و لسة بيساعدني
لأخواتي
لإصحابي اللي بعشقهم على تويتر
أصحابي و رفقاء الدرب
ورحلة الأيام اللي هنبدئها سوا في الإخراج السينمائي
للي علمني اقرا و أكتب صح
للمذاكرة اللي انا كبرت عليها و تاعبالي
أعصابي في كلية الأعلام
للوجع اللي ما بينتهيش
للسما اللي حاضنة حلمي وجعى و أيامي
للأرض اللي شايلة همي و مستحملاني
للشوارع المكسية بلون الحزن والمطر
للدنيا اللي من غدرها ما في مفر
للعتاب واللوم و بكا الليالي اللي مبيأثرش
للحظة حلوة عيشناها يمكن ما ترجعش
لأمل في بكرة يمكن يندهلنا
لوجع كل ست راح ضناها منها
لعم يونس بياع الجرايد اللي كل ما يشوفني
يقولي والله بكرة هيكون أحلى بس نفسي يوم أشوف عينك بتلمع من الفرح نفسي يا بنتي يوم أسمع
صوتك اهز راسي ليه واقوله من غير صوت
والله من قلبي بعزك .
للطاهر عبدالله وحلم أخراجي فيلم عنه
للي علمني أحب الطاهر عبدالله
لفرحة قلب هتفضل في دمي العمر كله
لحلم بحلم أفضل فيه ومصحاش
للسمرة بلادي
كل سنة و أنتم طيبين و يارب تكون سنة خير
و أمل جديد
وأحلام حلوة و شتا دافي وشمس نهار
تنور دربنا
كل سنة و أنا بيكم أجمل
هناك تعليقان (2):
هو أنتِ ليه جميلة كده و حزينة كده
ليه كل حاجة بتقوليها بتلمس القلب كده
ليه أساسا في زيك في الدنيا السخيفة دي !!!
غير معرف ...
وانا مش عارفة ليه أعتبرت أني أساسا أستاهل أعيش في الدنيا دي كده !!!
مش عارفة أقول أيه بصراحة:((
إرسال تعليق