طول عمرها بتحب ريحة المطر زي ناس كتير
في الدنيا دي مش حكاية ريحة تراب لأ ,,
بتحس أنها حاجة كده بتتغلغل جوا مسام روحك
بدل ما أنت ألف واحد في بعض بتخليك متحد مع
ذاتك .
بتكره البرد بس كانت بتستنى المطر أصله عامل
زي الفرح بيزورنا قليل بيدق البيبان اللي
هدها الهم والوحدة , بيجي لقلوب الشقيانين
من غدر البني أدمين و كدبهم بيجي للولاد الصغيرين بيجي يطبطب على كتفك و يمكن
يحضنك ويمشي
لكن !!
هي فعلاً أول مرة متستناش المطر و تخاف منه
زي البرد, كفاية موقف أو أحتياج أو ذكرى
أو حتى كلمة مهمـا كانت صغيرة تخليك تخاف
تقرب من اللي بتحبه
يوم المطر كان عامل زي خط نهاية السباق ,
يوم الحقيقة يوم مواجهة ذاتك اللي بتتخانق
معاك ومحدش راضي فيكم يسمع للتاني ,,
يوم المطر
عرفت أن هي مش هي ,,
مش صح , طريقها غلط , أحساسها غلط ,
عطائها غلط ,
أحتياجها غلط , كلها غلط
المطر عندها مبقاش زي الحنين
أصبح ذكرى أنين
دي كانت حدوتة بنت بتحب كانت بالحلم عايشة
بتسقي قلوب العطشانين ونسيت تروي قلبها
حدوته بنت كانت بتحب , كانت بالهمس عايشة
بداوي قلوب المجروحين و نسيت أزاي تطيب جرحها
حدوته بنت كـانت بتحب
و دفنت حلمها بأيدها يوم المطر !!
ليست هناك تعليقات:
إرسال تعليق