حكاية فرفورة .....

هقول حكاية عن بنت صغنطوطة

 قد الفتفوتة ملكت قلبى

وقالتلى يانونا احكيلى حكاية

قلتلها بلاش يا قطقوطة

لحسن الحكايات خيال

 زعلت

و قالت طيب اعمل ايه

 قلتلها أحلمى يا فرفورة

ببكرة أحسن من النهاردة

 و حققي حلمك

ومتبقيش وردة دبلانة فى كتاب قديم ...

ومتخليش غشاوة عينك
تبعدك عن الحقيقة

حقيقة أنك متبقيش أنا

متعيديش الحكاية

حكاية بنت

 كانت زيك زمان مليانة فرح وأمان

وصبحت لقت نفسها مليانة بالاحزان

لقت نفسها اتنين
وكل واحد فيهم ميعرفوش التاني

متبقيش الا انتِ ....

أنتِ و بس

أيامك هى اللى جايا

أنا أيامي اللي راحت

واللى بيروح مابيرجعش

خلى أيامك فرح و أمل

موش بكا و ألم

فوقي وأعرفي

أن الخيال هيفضل خيال

أصحي يا فرفورة

 وسيبك من الحكايات

و كوني أنتي

الأمل