عمري ما أتكسفت أقول سني الحقيقي قدام حد و بضحك أوي على اللى بيتكسفوا يقولوا ناسيين إن الوشوش بتظهر السن مش محتاجة ذكاء و حتى بكتبه على بروفايلى في أي مكان أنا مصرية الهوية عراقية المولد عام 1977 يعني أنا 35 سنة :) طول عمري عندي شعر طويل أسود زى الأبانوس بابا لحد ما كبرت و إتجوزت بيرفض إني أقصه مشكلة كنت بأعانيها من وأنا 7 سنين دايماً يقوللي شعرك مش ليكي لوحدك لكل اللي بيحبوكي و أنتِ تنتمي ليهم كنت أقوله يا بابا زهقت منه و أنا محجبة هتفرق أيه يقولي متزهقيش لأنه زي الجنة .. لما بابا مات و حصلي الإنهيار الغير العادي في حياتي و شخصيتي و قراراتي القوية تخبط تخبط في كل حاجة بعد ما توفي بشهر و نص أول حاجة عملتها قصيت شعري و غيرت لونه شفت شعري على الآرض بطوله العجيب ده و المدموزيل اللى بتشتغل تقولي حد يعمل كده :) بصيتلها بصة عدوانية و قلتلها شوفي شغلك .. ومن يومها شعري قصير ولونه وقور جداً مناسب مع شخصيتي .. و أنا بتوضى للفجر النهاردة بسرح شعري لقيت شعراية بيضا بصيت أكثر لقيتهم 3 .. هقولكم الحق اتخضيت أوي فضلت أدور في شعري كلو ملقيتش الا التلاتة دول .. فضلت أفكر هو ده جد.. أنا بكبر و شعري خلاص هيكون أبيض مع الوقت و دي البداية .. و ياترى ههرب من سني و أخاف أقولوا ؟ و يا ترى ايه اللى بيكبر مع الشعر و يشيب الأفكار ؟ المعتقدات ؟ القلب ؟ لسة حاسة أني بنوتة ماما اللى مبتكبرش لسة أخواتي الاتنين بيعاملوني على أني رنا اللى في رابعة ابتدائي أختي اللى في النص دايماً تقوللي مع كم التخبط اللى انا فيه اليومين دول و بصراحة تخبط في منتهى الغباء أعترف :) أنتِ لسة صغنونة و عاوزة اللى ياخد بالو منك مع أني حضراتكم أنا متجوزة و عندي ولد و بنت طعمين أخر حاجة .. جاتلي رهبة غريبة و بعد ما صليت فضلت أفكر أيه اللى عملتوا في حياتي صح عدي يا رنا .. و أيه الغلط ؟ عمرك جري ضيعتيه في أيه في بكا و حزن ؟ على أيه و على مين .. ليه معملتش زي ماما تطلع الساعة 6 الصبح تاخد نفس كبير من الهوا المندي ليه مخدتش حبوب زي ما بتعمل و تفرد ايديها علشان العصافير تاكل منها ليه مدربتش نفسي على كم السلام الروحي اللى كانت عايشة بيه مخلي النور يتنطط على وشها .. أختي الكبيرة بتقوللي دايما الحياة حلوة بس اللي يفهمها و ميكونش عنده أصرار على الغباء أنت صح و أنا غلطت و حقك على راسي من فوق يا باشا :)) تجربة أول مرة أعدي بيها يمكن هايفة عند البعض بس حاسة أنها جَلل في حياتي و هتخليني أبدأ افكر من جديد أنا ناوية أعمل أيه في أيامي اللى جاية ..
قمت من
على السجادة و أنا بيتردد في راسي
و كلمات عمنا الكبير صلاح جاهين
قمت من
على السجادة و أنا بيتردد في راسي
و كلمات عمنا الكبير صلاح جاهين
أنا العجوز الشايب الحزين
أنا العجوز من غير ما تمضي السنين
أنا العجوز من قبل سن الأربعين
عمري النهاردة
رغم المرار ده
في عمر وردة
عشرين سنة
و عجبي
~ ~ ~ ~ ~ ~
Rana @
ليست هناك تعليقات:
إرسال تعليق